客途秋恨

（南音）涼風有信

秋月無邊

虧我思嬌情緒

好比度日如年

小生系繆姓

乃是蓮仙字

為憶多情嘅歌女呀

叫做麥氏秋娟

見佢聲色以共性情人讚羨

佢更兼才貌咯就的確兩相全

今日天隔一方難見面

似以孤舟沉寂晚景涼天

你睇斜陽照住個對雙飛燕

睇我獨倚蓬窗我就思悄然

耳畔聽得秋聲桐葉落

又只見平橋衰柳鎖寒煙

第一觸景更添情懊惱

虧我懷人愁對果個月華圓

正系舊約難渝潮有信

新愁深似呀海無邊

睇我這種情緒悲秋同宋玉

況且客途嚟抱恨你話叫我對乜誰言

近日聽得話有羽書馳諜報

仲話干戈撩亂

擾亂嘅江村

個啲崑山玉石也遭焚燬

好似避秦男女入桃源

你係幽蘭不肯受汙泥染

又怕賊星來犯月中仙

你話嬌花若被狂風損

果陣玉容無主你話倩乜誰憐

一定輾轉馬前遭血濺

日落魂歸玉化煙

你話若然豔質系遭凶暴

我寧願同埋白骨去伴姐妝前

或者死後得成連理樹

好過生時常在囄個奈何天

但望慈航法力總要行方便

把楊枝甘露救出你火坑蓮

等你劫難逢凶俱化吉

果滴災星魔障兩不相牽

虧我心似轆轤千百轉

空綣戀

嬌呀但得你平安願

我就任得你天邊靚明月啊

都照向別人圓。

（乙反南音）聞擊柝

鼓三更

只見江楓漁火照住個愁人

幾度徘徊思往事

勸嬌唔好咁痴心

你話風塵不少不少憐香嘅客

羅綺還多識玉人

試問煙花誰不貪豪富

仲乜你偏把多情向住小生

況且我窮途作客囊如洗

擲錦纏頭愧未能

記得填詞偶寫個段胭脂井

你含情相伴對住盞銀燈

你細問我曲中何故事

我把陳後主個段風流講過你聞

講到兵困景陽家國破

歌殘玉樹後庭春

（拋舟腔）攜住二妃

攜住二妃藏井底

死生難捨難捨難捨佢嘅意中人

你聞聽此言多嘆息

仲話風流天子更重系情真

但系唔該享盡個啲奢華福

（轉正線）就把錦繡江山毀路塵

你係女流也曉興亡恨

不枉梅花為骨雪為心

仲話我珠璣滿腹啫實在原無價

我知你憐才情重更不嫌貧

我想到此情慾把嫦娥問

無奈啊見得楓林月色昏

遠望那個處樓臺人影近

人影近

莫非相逢呢一位是月下魂