懷念羅文
有關懷念羅文 :
如果你正在尋找適合的音樂來調整自己的心情，那就上JOOX在線收聽 懷念羅文吧！ 由周啓生 一同推出的 懷念羅文 於 2025年11月13日 上架，收錄合共14 首歌曲，每首作品互相配合，造就這張完美的專輯！
23年前嘅10月忽然收到羅記羅文離世嘅消息，內心忐忑。當時心裏面將幾十年同佢相交，相知，相識嘅一切片段喺腦海不停咁重播又重播。食嘢都食唔落去，身體最誠實。我出去逛一逛，走到九龍通利琴行買咗兩支木吉他，買咗啲食物，走回錄音室就隨手開始彈咗啲羅文嘅歌。
羅記嘅歌:有好多都系我細個時我跟師傅顧嘉輝嘅時候一齊做編曲嘅，亦有一啲我讀緊中學時候好喜歡羅文嘅歌曲，例如"前程錦繡"，我開始彈彈彈，當時只想懷緬，憶錄一下，亦冇任何目的同計劃去做任何事。
跟住撳個錄音機嘅掣，攞支吉他就開始錄音。連續差唔多三日冇離開過錄音室，接近72小時淨系食我買嘅杯麪乾糧，飲錄音室嘅蒸餾水。最終將14只歌吉他嘅部分全部彈曬，總算鬆一口氣。
三日裏面喺錄音室涼都冇衝過，只繫好攰嘅時候就休息一陣間，根本上加埋都瞓唔到幾個鍾，帶住好疲累嘅身軀返屋企枕低曬一切，好好瞓一覺。
之後再返錄音室做後期嘅工作，加鋼琴，加一啲簡單嘅聲效，然後加完曬再混音。成件事搞咗差唔多半年，亦都系收咗喺我自己嘅櫃筒裏面。從來冇諗過要發行。呢只專輯，只不過系一個心願，耐唔中攞出嚟聽，夜晚瞓唔着，長夜難眠，無心睡眠，攞出嚟聽下，即刻心底泛起一陣暖意，諗起好朋友亦都聽番自己做過嘅嘢。
經過咗23年，我再重新揾個大師幫我master母帶，今次正式將佢攞出嚟同大家分享14首歌。輕鬆冇壓力。當時系冇譜冇任何其他（錄音室用嘅拍子機，Click,乜都冇），就咁隨手彈，聽出嚟系更加冇邊際，好舒服。啲鼓聲系我自己輕輕咁拍個吉他，然後將佢重複駁起嚟用嚟扮鼓聲。
所以羅文呢個專輯系最適宜大家靜靜休息嘅時候聽，夜晚聽又得，揸車嘅朋友都可以聽，系一定唔會越揸越快嘅。希望大家喜歡一個咁温柔、温婉可愛嘅14首羅文純音樂。好想大家聽完之後再俾意見我（網上@微信或者小紅書留言俾我）。謝謝大家！
