白馬

白馬 - 米莎

詞：溫尹嫦

曲：溫尹嫦

冬

越過大海

季風渡來另外一種色個人

也渡來白馬

摎自家會走個火車

莊肚人看麼個都系新個

吂知白馬會帶走

佢兜所有個細孲仔

也吂知毋過百年

森林會從山頂挲入佢兜個田坵

這當下

瞨目個長老用手指摸過山脈

講該山脈系盡恬盡恬個海浪

又講發風了

愛起浪了

春

越過大海

確實系起浪了

深暗個山脈天恁高逼來

日月無光

十五歲個後生仔擘開歸身目珠

烏疏滴溚裡肚相㓾

紅馬一飆上天

火灰遍野

較遠個所在天色臨暗

有人緊打語言個子彈

河壩青驚

水流結冰

頭擺 以後 所有個事情

凍成硬確確個石頭

沉落水底

夏

越過大海

到今佢兜還系毋知

柑仔花愛開該時節

仰會歸樹仔花苞變做石頭

禾仔麥仔摎包粟全部冇谷

淨記得原旦望等雷公帶雨水

嗄聽著遠遠個腳蹄

烏馬食忒月光 連等三年有日無夜

阿姆個乳菇同圳仔燥燥

無五穀 無蜜 無乳

渴人個風

還生個人迷迷痴痴

毋醒也無夢

最尾佢兜總系聽著

地泥肚飢個聲

噠 噠噠 噠

噠噠 噠 噠