白马

白马 - 米莎

词：温尹嫦

曲：温尹嫦

冬

越过大海

季风渡来另外一种色个人

也渡来白马

摎自家会走个火车

庄肚人看么个都系新个

吂知白马会带走

佢兜所有个细孲仔

也吂知毋过百年

森林会从山顶挲入佢兜个田坵

这当下

瞨目个长老用手指摸过山脉

讲该山脉系尽恬尽恬个海浪

又讲发风了

爱起浪了

春

越过大海

确实系起浪了

深暗个山脉天恁高逼来

日月无光

十五岁个后生仔擘开归身目珠

乌疏滴溚里肚相㓾

红马一飙上天

火灰遍野

较远个所在天色临暗

有人紧打语言个子弹

河坝青惊

水流结冰

头摆 以后 所有个事情

冻成硬确确个石头

沉落水底

夏

越过大海

到今佢兜还系毋知

柑仔花爱开该时节

仰会归树仔花苞变做石头

禾仔麦仔摎包粟全部冇谷

净记得原旦望等雷公带雨水

嗄听着远远个脚蹄

乌马食忒月光 连等三年有日无夜

阿姆个乳菇同圳仔燥燥

无五谷 无蜜 无乳

渴人个风

还生个人迷迷痴痴

毋醒也无梦

最尾佢兜总系听着

地泥肚飢个声

哒 哒哒 哒

哒哒 哒 哒