咩事姐娛樂快訊：減肥豬事不和錄

咩事姐娛樂快訊：減肥豬事不和錄

堪稱電視史上宇宙級無聊的「肥脆台」，開台巨製剛於周三作網上首播，主席張徑車同一姐王遠豬（又名菀B姐）於節目中大方分享減肥秘技，教大家告別拜拜肉與肥腩，引來無聊人士爭相模仿。節目期間，二人互送超鄙視眼神，火花四射，坊間立即傳出不和傳聞？！我咩事姐當然立即跟進！

據消息人士透露，菀B姐為求節目效果精益求精，開會期間不惜亂用四字成語激發創意，一度收唔到口，令張敬車大受刺激，半夜殺落便利店，食足30個杯麵，極速肥返再瘦返，以身試法，尋求減肥真諦。我咩事姐本著求真精神，曾致電菀B姐了解，佢就話：「今次同車仔嘅合作，真係覺得肥開得勝，唔肥唔食，不和嘅新聞好無聊，in a way，好強調到我哋嘅電視台風格，相信會開拓到新世代無聊市場。」

張敬車出席無聊萬事得車展期間，則一邊抹汗一邊大讚菀豬姐真性情值得敬佩，自己肥瘦自如，唔覺辛苦喎，更表示：「杯麵誠可貴，無聊價更高。」敬車講啲與唔講啲之間，更透露下集更會將錯就錯，兩位化身成語界名人——Tell me YY與紅貓博士，冬天梗係講下家居必備收納術，更大談腐朽變褲鈕的秘方，期間因主題無聊過頭，自己有一刻接受唔到要喪笑離場，好在最後由定過抬油嘅菀B姐由頭帶到尾喎！

新組合難免需要時間磨合，我咩事姐覺得大家不妨比啲空間佢哋，且看下回分解。

去片睇肥脆台 Ep1 - 並不日常生活小百科 (只支援手機版瀏覽)：